නිදි යහනයේදී කළ යුතු නොකළ යුතු දෑ

සාමාන්‍යයෙන් මිනිසකුට දිනකට පැය 7 නින්ද අවශ්‍යය. ළදරුවකුට නම් මෙය පැය 16 – 20 අතර කාලයකි. ළමයකුට නම් පැය 10 – 12 ක් අවශ්‍ය වන අතර, වැඩිහිටියකුට හෝ රෝගියකුට වැඩි කාලයක් නිදාගැනීම අවශ්‍ය වේ. දිවා කාලයේ දී ශරීරයේ ගෙවී යන කොටස් රාත්‍රි නින්දේදී නැවත ප්‍රකෘති තත්ත්වයට පත්වේ. මෙය නිසා මිනිසාට නින්ද අත්‍යවශ්‍යය.


නිදා ගන්නා ස්ථානයේ සැපවත් නින්දකට උචිත පරිදි නිදන කාමරය සකස් විය යුතුය. මෙය නිසා නිදන කාමරය ඍජුකෝණාකාර විය යුතු අතර එය උචිත පරිදි නිදන කාමරය සකස්විය යුතුය. වාස්තු විද්‍යාව නිර්දේශ කර ඇත්තේ උතුරු දිසාවයි. නව යුවළකට නම් උතුර වයඹ අතර දිසාව ඇති කාමරය සුදුසු බවයි. එය පැරණි වාස්තු විද්‍යා ගෘහ දිසා චක්‍රයේ රති ගෙය වශයෙන් හඳුන්වා දී ඇත. මෙයට අමතරව වයඹ සහ නිරිත දිසාවන්හි පිහිටි කාමර ද නිදන කාමර සඳහා සුදුසුය.
නිවසේ අඹු – සැමියන් අතර සමගිය සහ ආදරය වර්ධනය වන ස්ථාන මෙය නිසා එය නිසියාකාරයෙන් සකස් විය යුතුය. ඉහත දිසාවන් හැර මහල් නිවාස නම් පඩිපෙළවල් යට, නාන කාමර ආදියට යටින් නිදන කාමර ඉදිවීම එතරම් සුබ නැත. ඒ වගේම ගිනිකොණ දිසාවද ඉතා අසුබය.
නිදන ඇඳ තිබිය යුතු දිසාව
නැගෙනහිරට හෝ දකුණට හිසලා නිදාගත යුතුය. ගෙදර මූලිකයා නැගෙනහිරට හිසලා නිදා ගැනීමෙන් එම නිවසේ ආධිපත්‍ය ඔහුට හිමිවේ. උතුරට හෝ බටහිරට හිසලා නිදාගැනීම බොහෝ දෙනා බිය වෙති.
නිදන ඇඳ
සුව නින්දට උචිත පරිදි නිදන ඇඳ සකස් විය යුතුය. මෙය දැවෙන්ම නිර්මාණය විය යුතු අතර, යකඩ හෝ ඇලුමිනියම් ඇඳන් සුදුසු නැත. නින්දට උචිත පරිදි කොට්ටා, මෙට්ටා ඇඳ ඇතිරිලි සකස් විය යුතුය. බාල්ක, මුදුන් යට ලී කොන්ක්‍රීට් බීම් ආදියේ යටට අසුවෙන ආකාරයට නිදන ඇඳ නොතැබිය යුතුය. ඇඳ නිදන කාමරයේ දොරට කෙළින් තිබීමද අසුබදායකය. ඇඳට දොරට කෙළින් පියගැට පෙළක් තිබීම එතරම් සුබදායක නැත. එසේම වැසිකිළි, නාන කාමර ආදියේ දොරවල් ද ඇඳ කෙළින් සිටින සේ තැබීම සුබදායක නැත.
නින්ද ගැන
දිවා කාලයේ නිදා ගැනීම සෙම, පිත් කෝප වීමට හේතුවේ. මෙය විවිධ රෝගවලට හේතු වේ. මෙය වද්‍ය මතයයි. නිදිමත නැති වීමට හේතු රාශියක් ඇති බව ඔවුන් පෙන්වා දේ. රාත්‍රි කාලයේ වාත පීත කෝප වීම, උෂ්ණ පරිසරය, අධික දුම්පානය ඉන් සමහරෙකි. ඒවගේම නිදා ගන්නා ඇඳ ද නිසියාකාර නොතිබීම මෙයට එක් හේතුවකි. මෙයට හොඳ ප්‍රතිකර්මයක් ලෙස පොතක් පත්‍රයක්, සඟරාවක් නිදි යහනයේ සිට කියවන්න. මෙසේ වීමෙන් සිතේ ඇති ගැටලු පහවී සුවදායක මානසික නින්දකට හේතු වේ.
ආහාර ගැනීම
නිදි යහනේ සිට ආහාර ගැනීමට සමහර අය පුරුදු වී සිටී. මෙය නුසුදුසු ක්‍රියාවකි. ආහාර අජීරණයට හේතුව මෙය බව වෛද්‍ය මතයයි. මෙයින් ඔවුන් පෙන්වා දෙන්නේ ආහාර ජීරණයට අවශ්‍ය හෝමෝනය හරිහැටි ක්‍රියාත්මක නොවීමයි.
වැඩ කිරීම
සමහර කාන්තාවන් නිදිමත හැදෙන තුරු නිදි යහනයේ සිට මැහුම් ගෙතුම් කරයි. මෙය සැපවත් නින්දකට බාධාවකි. මෙය නිදි යහනේ නොකළ යුතු දෙයකි.
රූපවාහිනි බැලීම
නිදි යහනයේ සිට රූපවාහිනි බැලීම බොහෝ දෙනෙක් පුරුදු වී සිටිති. මෙසේ සිටීම තුළින් රූපවාහිනියෙන් නිකුත් වන ආලෝකධාරාව ඇසට වැටීම සුබදායක නැත. මෙය මනසට තදින් බලපෑමක් ඇති වේ. ඒ තුළින් නින්දේ දී බියකරු සිහින පෙනීම, සිහිනයෙන් බියවීම වැනි දේ ඇති වීමට හේතු වන බැවින් මෙය නතර කළ යුතු ක්‍රියාවකි.
සුබ සිතුවිලි මනසට පුරවා ගන්න
ඔබ ඉගෙනීම ලබන අයෙක් නම්, හෙට දිනයේදී ඉගෙනීමට ඇති දේවල් මෙනෙහි කර නිදාගන්න. විභාගයකට ඉදිරිපත් වන අයෙක් නම්, හෙට දිනයේ දී ඒ ගැන සිතා නිදා ගන්න. ආදරවන්තයෙක්, වන්තියක් නම් සිහින ලෝකයේ කිමිදෙන්න. එවිට හෙට දිනය ඔබට යහපත් දිනයක් වෙනවා මෙන්ම ඔබගේ නින්ද ද සුබදායක වනු ඇත.

විවාහක අඹු – සැමියන්ට
අඹු – සැමි සබඳතාව පැවැත්වීමට හොඳම ස්ථානය නිදි යහනයි. ඒ වගේම ඔවුනට ප්‍රේම සල්ලාප ආදියට ද සුදුසුම ස්ථානය නිදි යහනයි. යුග දිවියේ සාර්ථකත්වයට මෙය බෙහෙවින්ම උපකාර වේ. ඒ වගේම හොඳට මතක තබාගත යුතු කරුණක් වන්නේ දූදරුවන්ගේ ප්‍රශ්න, ආර්ථික ගැටලු නිදි යහනයේදී කතා නොකළ යුතු දේවල් බව.
ඔබගේ නින්දට බාධා ඇති වන්නේ නම්, මේ උපදෙස් පිළිපදින්න
1. ඔබගේ නිදන කාමරය මද අඳුරේ තිබෙන ආකාරයට සකස්කර ගන්න.
2. නිදා ගැනීම අවදි වීම සෑම දිනයකදීම එකම වේලාවකට පුරුදු වන්න.
3. නිදා ගැනීමට පෙර දුම්පානයෙන් වළකින්න.
4. නිදා ගැනීමට පැය 2 කට කලින් රාත්‍රි ආහාර වේල ගන්න.
5. නින්ද ලබා ගැනීමට අපහසු නම් සුළු වේලාවක් ව්‍යායාම ආදියෙහි යෙදෙන්න.
6. නිදි යහනට ගොස් පැය 1/2 කට වඩා නින්ද නොයන්නේ නම් පොතක් පත්‍රයක් සඟරාවක් කියවන්න.
7. නින්ද යෑමට ඉතාම හොඳ ඖෂධය නම් නින්දට පෙර පැය 1/2 ක් මෛත්‍රි භාවනාව කිරීමය..
ජ්‍යොතිෂ්‍ය
වාස්තු විද්‍යා උපදේශක, ධර්මාචාර්ය
විද්‍යාජෝති ධර්ම බන්දු දේශකීර්ති සාම විනිසුරු (මුළු දිවයිනටම) ජ්‍යොතිර් විද්‍යා කීර්ති ලංකාපුත්‍ර
ප්‍රේමසිරි කහඳවලආරච්චි
252/1, පුලිනතලාරාම පාර,
මාගම්මන, රාගම