ගුණවත් වාසනාවන්ත පංචකල්‍යාණියක් ජන්ම පත‍්‍රය තුළින් හඳුනා ගනිමු

වචනයෙන් කියාගත නොහැකි වුවද විවාහ වීමට අපේක්‍ෂාවෙන් සිටින තරුණයන් බොහෝ දෙනකුගේ පැතුම රූමත් ගුණවත් වාසනාවනත බිරිඳක් ලැබීමය. ගුණවත් කරුණාවන්ත බිරිඳක් ලබන තැනැත්තා සැබවින්ම වාසනාවන්තයෙකි.


බුදු දහමේද භාර්යාවරු සත්දෙනෙක් පිළිබඳ සඳහන් වේ. ඒ වධක, චෝර, ස්වාමි, දාසි, සඛී, භගිනි හා මාතෘ භාර්යා යනුවෙනි. ඒ අතුරින් මාතෘ වර්ගයේ භාර්යාවෝ ලබන්නෝ ඉතාම වාසනාවන්ත බව සඳහන් වේ. එසේම දේහ ලක්‍ෂණ විද්‍යාවේදී ස්තී‍්‍රන් සතර ආකාරයකට වර්ග කර ඇත. ඒ පද්මිනී, චින්‍දිනී, සංඛිනී හා හස්නිනී වර්ගයේ ස්තී‍්‍රන් යනුවෙනි. දේහ ලක්‍ෂණ විද්‍යාවට අනුව පද්මිනී හෝ චින්‍දිනී වර්ගයේ ස්ති‍්‍රයක් තම බිරිඳ ලෙස ලබන තැනැත්තා ඉතා වාසනාවන්ත බව සඳහන් වේ. තවද පද්මිනී වර්ගයේ ස්ති‍්‍රන් මාතෘ භාර්යා ගනයට වැටෙන බවද සඳහන්ය. ජ්‍යොතිෂමය වශයෙන් ජන්ම නැකත අනුවද ස්තී‍්‍රන් වර්ග කළ හැක. එහිදී මුවසිරස, අස්ලිස, පුවපල්, පුවසල හා උත‍්‍රසල යන නැකැත් පද්මිනී වර්ගයේ ස්තී‍්‍රන්ට හිමි බව සඳහන්ය. එසේම චින්‍දිනී වර්ගයේ ස්තී‍්‍රන්ට මුල, විසා හා උත‍්‍රපල් යන නැකැත්ද සංඛිනී වර්ගයේ ස්තී‍්‍රන්ට කැති, හත, අනුර හා දෙනට  නැකැත්ද හස්තිනී වර්ගයේ ස්තී‍්‍රන්ට සියාවස හා රේවතී යන නැකැත්ද අයත් බව සඳහන් වේ.
රූමත් දුටුවන් නෙත් සිත් බදනා අඟ පසඟක් හිමිවීමට අනිවාර්යයෙන්ම පෙර පින් තිබිය යුතුය. එවැනි පෙර පින් ඇත්තියක් පංච කල්‍යාණියක් ලෙස හඳුන්වයි. අංග ලක්‍ෂණ විද්‍යාවේදී පංච කල්‍යාණය ලෙස ස්ති‍්‍රයක් සතු කරුණු 5 ක් සලකා ඇත. ඒ දන්ත, චවි, කේෂ, මාංශ හා වයස් යන කරුණුය. උක්ත කල්‍යාණයන්හි ප‍්‍රශස්ථ මට්ටම් සලකා පංච කල්‍යාණියන්ද යන වග තීරණය කළ හැක.
ජ්‍යොතිෂයට අනුවද දක්‍ෂ ජ්‍යොතිෂවේදිකුට කේන්ද්‍ර සටහනක් දුටු පමණින්ම එම කේන්ද්‍ර හිමි තැනැත්තියගේ රූප ශෝභාව, අඟ පසඟ මෙන්ම ගතිගුණ ද මනාව අවබෝධ කරගත හැක. එලෙස ජ්‍යොතිෂයේ පංච කල්‍යානණියක්ද යන්න හඳුනාගත හැකි ග‍්‍රහ පිහිටීම් කිහිපයකි. ඒ මෙසේය.
1. ලග්නාධිපති ග‍්‍රහයා ලග්නගතව සඳු සමග සිටීම.
2. ලග්නාධිපති ග‍්‍රහයා බලවත්ව ලග්නයේ වීම.
3. පුර පක්‍ෂයේ බලවත් චන්ද්‍රයා ලග්නගත වීම
4. චන්ද්‍ර සහ ගුරු යන ග‍්‍රහයන් ලග්නගත වීම එලෙස ලග්න ගත වූ චන්ද්‍ර හා ගුරුට 5 වැන්නේ හෝ 7 වැන්නේ හෝ 9 වැන්නේ හෝ සිටින සිකුරුගේ දෘෂ්ටිය ලැබීම.
5. 5 වැන්නේ හෝ 9 වැන්නේ හෝ ගුරු සිකුරු පිහිටීම.
6. ලග්නාධිපති 7 අධිපති සමග යෝගවීම
7. ලග්නාධිපති 7 අධිපති වී සෞම්‍ය ග‍්‍රහයන් සමග සිටීම.
8. 7 අධිපති ගුරු සමග හෝ ගුරුගේ දෘෂ්ඨියට ලක්වීම.
9. ලග්නයෙන් 7 වැන්නේ බලවත් ගුරු හෝ සඳු සිටීම.
10. සඳුගෙන් 7 වැන්නේ ගුරු සිටීම.
11. ලග්නය තුලා, මකර, කුම්භ වී ශනි එහි සිට ශුභ දෘෂ්ඨි ලැබීම.
12. 9 වැන්නේ සිකුරු සඳු ගුරු පිහිටීම
මීට අතිරේඛව චන්ද්‍ර කුජ හෙවත් චන්ද්‍ර මංගල යෝගය, සිකුරු කුජ හෙවත් සිකුරු මංගල යෝගය යෙදුණු කේන්ද්‍ර හිමි තැනැත්තියන්ද ඉතා රූමත් සුරූපිනියන්ය. එය එසේම සිදුවන්නේ එම යෝගයනට පාප දෘෂ්ඨි නොවැටීම හා එම ග‍්‍රහයන්ගේ බලවත්භාවය මතය. එය එසේ වුවද මෙම යෝග හිමි ස්ත‍්‍රීන් කාමාධිකය, සෙල්ලක්කාරය. යම් අයුරකින් උක්ත යෝගයකට රාහු කවර ආකාරයෙන් හෝ සම්බන්ධ වුවහොත් බොහෝ විට තම චරිතය කැලැල් කර ගැනීමේ ප‍්‍රවනතාවයක් ඇත. එසේම කුජ, රාහු වැනි පාපී ග‍්‍රහයන් 7 වැන්න 8 වැන්න වැනි ස්ථානවල වීමද චරිතය අපිරිසිදු කර ගැනීමේ අවදානමක් ඇති පිහිටීම් බව ජ්‍යොතිෂයේ සඳහන්ය.
ස්තී‍්‍ර අගපසග සම්බන්ධයෙන්ද යම් අදහසක් ග‍්‍රහ පිහිටීම් තුළින් නිගමනය කළ හැක.
1. ස්තී‍්‍ර කේන්ද්‍රයක කුජ ග‍්‍රහයා 4 වැන්නේ බලවත්ව සිටින කල මනාව වැඩුණු ඉදිරියට නෙරූ කවාකාර පියයුරු සගලකට හිමිකම් කියයි.
2. 4 වැන්නේ සඳු කුජ පිහිටි ළඳුන්ගේ ඉග ඉතාම හැඩය. උකුල පුළුල්ය. පියයුරු මනාව පිහිටා ඇත.
3. 7 වැන්නේ සඳු, ගුරු, කුජ පිහිටි ළඳුන් මසින් පිරි දුටුවන් නෙත් සිත් බඳනා කලවා යුග්මයකට හිමිකම් කියයි.
ඉහත සඳහන් ආකාරයේ ස්තී‍්‍ර අවයවවල ස්වභාවය, පැහැය හා මෘදු මොළොක්භාවය සම්බන්ධ ග‍්‍රහ පිහිටීම් ගණනාවකි. එහෙත් ඒ සියල්ල සවිස්තරව මෙහි සඳහන් නොකළේ ලිවීමට තරම් සුදුසු නොවේ යැයි හැගුණු බැවිනි. තවද විධිමත් කේන්ද්‍ර පරීක්‍ෂාවකදී වාසනාවන්ත විවාහ හිමි ස්ත‍්‍රීන් මෙන්ම නපුරු කෲර ගතිගුණවලින් යුත් ස්තී‍්‍රන් බිහිවන පිහිටීම්ද ජ්‍යොතිෂවේදීන්ට පහසුවෙන් හඳුනාගත හැකිය. වාසනාවන්ත විවාහයක් හිමි පිහිටීම් ගණනාවකි. ඒ මෙසේය.
1. පාප දෘෂ්ඨිවලින් තොර සුබ ග‍්‍රහයකු ලග්නගතවීම
2. 5 වැන්නේ ගුරු ශුක‍්‍ර සංයෝගය පිහිටීම.
3. පුර පාර්ශ්වයේ ඉපදීම 7 වැන්නේ බුධ ශුක‍්‍ර යෝගවී සිටීම
4. 7 වැන්න කටකය වී ගුරු ග‍්‍රහයා එහි සිටීම.
5. 7 වැන්නේ සඳු බුධ සංයෝග වීම හා ඊට භුභ දෘෂ්ඨි ලැබීම.
6. ලග්නයේ ගුරුත් 7 වැන්නේ සඳුත් 10 වැන්නේ සිකුරුත් පිහිටීම.
7. ලග්නයේ හෝ 4 වැන්නේ බලවත් සඳු, බුධ, ගුරු, සිකුරු සිටීම.
8. ලග්නාධිපති හා 7 වැන්නාධිපති 7 වැන්නේ සිටිමින් ගුරු හෝ සඳුගේ දෘෂ්ඨියට ලක්වීම
9. ගුරුගේ දෘෂ්ඨියට ලක්වන 7 වැන්නේ බුධ ශුක‍්‍ර සංයෝගය තිබීම සමගම 11 වැන්නේ සඳු පිහිටීම.
කරුණු කාරණා කෙසේ වෙතත් විවාහයක් සඳහා පොරොන්දම් පරීක්‍ෂාවේදී විසි පොරොන්දම් ප‍්‍රතිශතය 75% ඉක්මවා ගැලපුනද අෂ්ඨ කූටය ඉතා යහපත් මට්ටමක තිබුණ ද සුදර්ශන චක‍්‍රය පවා හොඳින් ගැලපුනද ස්තී‍්‍ර කේන්ද්‍රයට පුරුෂ කේන්ද්‍රයේ ගැලපීම කෙසේද යන්න විමර්ශනාත්මකව බැලිය යුතුමය. එහිදී විවාහ දෝෂ කෙරෙහිද ඒවා භංග වන ආකාර කෙරෙහිද විශේෂ අවධානය යොමු කළ යුතුය. එවිට ඉතාම සාර්ථක, වාසනාවන්ත, පී‍්‍රතිමත් යුග දිවියක් හිමිකර ගත හැක. ඔබත් ඉහත කරුණු කාරණා සැලකිල්ලට ගෙන රූපය, අ`ගපසග, සිනහව, කථාව වැනි දෑට වශී නොවී ස්ත‍්‍රීන්ට මිල කළ නොහැකි ආභරණ බදු වූ නිහතමානීකම, කීකරුකම, සරල චාම් බව, කරුණාවන්තකම, ගුණගරුකභාවය, දැහැමි බව වැනි උතුම් ගුණයන්ගෙන් හෙබි ළඳක් ඔබගේ අනාගත භාර්යාව ලෙස තෝරා ගන්න. එවිට ඔබගේ ඉදිරි අනාගත ජීවිතය ඉතාම සාර්ථක පී‍්‍රතිමත් සැපත සතුට උතුරා යන සෞභාග්‍යමත් එකක් වනු නියතය.

ආචාර්ය මහේන්ද්‍ර පල්ලෙබැද්ද