ලංකාවේ පළමු ජය නෙදර්ලන්තයට එරෙහිව

ලෝක කුසලාන ක්‍රිකට් තරගාවලියේ ශ්‍රී ලංකාව සිය පළමු ජයග්‍රහණය නෙදර්ලන්තයට එරෙහිව ලබාගත්තේය.
මින් ඉහත පෙරළිකාර ලෙස ප්‍රබල දකුණු අප්‍රිකානු පිල පරාජයට පත් කළ නිසා නෙදර්ලන්තයේ අද තරගය ගැන බොහෝ දෙනා සැකයෙන් බලා සිටියහ.
ලක්නව්හි පැවති තරගයේදී නෙදර්ලන්ත පිල කාසියේ වාසිය දිනා මුලින් පන්දුවට පහරදුන් අතර ඔවුන්ගේ මුල් කඩුළු 6 ක්ම ලකුණු 91 දී ඇදවැටී අසීරු තත්වයකට පත්විය. නමුත් මැද පෙළ ක්‍රීඩකයින් වන එංගල්බ්‍රෙක්ට් හා බීක් යන දෙන්නා පිළිවෙලින් 70 හා 59 ක් ලබා ඉනිම ශක්තිමත් කළ නිසා ඕවර 49.4 කදී සියල්ලන් දැවී 262 ක ඉනිමක් ගොඩනගාගන්නට හැකි විය.

ඒ අනුව තරගය ජයගැනීම සඳහා ශ්‍රී ලංකා කණ්ඩායමට හිමිවී තිබූ ඉලක්කය ලකුණු 263කි.

ජයග්‍රාහී ඉලක්කය හඹා ගිය ශ්‍රී ලංකා පිතිකරුවන් පන්දුවාර 48යි පන්දු 02ක් අවසානයේ කඩුලු 5ක් දැවී ලකුණු 263ක් ලබාගනිමින් සිය ජයග්‍රහණය වාර්තා කළේය.